Herritarrek konfiantza dute ekonomian eta Aldundian, eta positiboki baloratzen dute haien ongizatea, maiatzeko Soziometroaren arabera

Gipuzkoako herritarrek gero eta asebetetze eta konfiantza handiagoa dute ekonomian eta Aldundiaren kudeaketan, Irune Berasaluze foru bozeramaileak gaur aurkeztu duen Gipuzkoako azken Soziometroak azaleratzen duenez. Inkestaren arabera, egoera ekonomiko pertsonalaren batez besteko balorazioa 10etik 6,63 puntukoa da, aurreko neurketekin alderatuta hobekuntza jarraituan, eta ongizate emozionalak eta familiaren eta gizartearen babesak ere maila onak dituzte, 7,52 eta 8,13ko puntuazioekin, hurrenez hurren. Gainera, Foru Aldundia lehen aldiz kokatu da herritarrek ondoen baloratzen duten erakunde gisa, eta Eider Mendoza diputatu nagusiaren figura nabarmentzen da, haren ezagutzak eta balorazioak gora egin baitute. Hain zuzen diputatu nagusiaren ezagutza espontaneoa ehuneko lau puntu igo da bost hilabetean. "Emaitzek Gipuzkoako gizartearen gogobetetze eta ongizate maila ona berresten digute, eta horrek egiaztatzen du bultzatzen ari garen politikekin bat datorren balidazio bat, gizartearen espektatibekin lotuta", baloratu du Berasaluzek.

2025eko maiatzeko Gipuzkoako Soziometroak gure lurraldeari dagozkion hainbat gai sozial, ekonomiko eta politikori buruz herritarrek duten pertzepzioa jasotzen du. Maiatzaren 22tik 28ra bitartean Gipuzkoan bizi diren 1.500 pertsonari telefonoz egindako elkarrizketen bidez lortutako datu nagusiak jakinarazi dira gaur, eskualdeka banatuta: 450 galdeketa egin dira Donostialdean, 350 Bidasoa-Oiartzunen, 350 Orian eta 350 Deba-Urolan.

Bozeramaileak azaldu duenez, gipuzkoarrek gero eta gogobetetasun handiagoa dute beren egoera ekonomiko pertsonalari dagokionez, 10etik 6,63ko batez besteko puntuazioarekin, 2024ko abenduan lortutako 6,58 puntuazioarekin eta 2023ko maiatzaren 6,39koarekin alderatuta. "Pertzepzio ekonomikoan jarraitutako bilakaera horrek egonkortasunean konfiantza progresiboa islatzen du, azken urteetako ziurgabetasun globaleko giroa gorabehera", adierazi du Berasaluzek.

Ongizate ekonomikoa, pertsonala eta soziala

Galdekatutako pertsonen % 68,7k uste du beren egoera ekonomiko pertsonala hobetu egin dela edo berdin mantentzen dela azken urteetan, eta % 63,9k uste du egoera hori egonkor mantenduko dela datorren urtean. Lurraldeari orokorrean begiratuta, % 44,8k uste du Gipuzkoako ekonomiak egonkor jarraituko duela; % 24,2k, berriz, okerrera egingo duen beldur da, eta % 16,9k hobekuntza espero du.

Ongizate emozionalari dagokionez, Berasaluzek nabarmendu du Gipuzkoak ongizate maila ona erakusten jarraitzen duela, hala emozionalean nola fisikoan, eta 7,52 puntuko balorazioa ematen zaiola 10etik gogo-aldarteari dagokionez. Inkestak erakusten du, halaber, herritarrak ondo lagunduta sentitzen direla, 8,13 punturekin, senide eta lagunek emandako babes sozial eta emozionalari dagokionez. “Soziometroaren datuek baieztatzen dute ongizate emozionala, fisikoa eta soziala positiboki baloratzen direla, eta horrek animatzen gaitu Plan Estrategikoan zehaztutako bidean sakontzen jarraitzera. Ongizatearen pertzepzioaren hobekuntza jarraituak gizarte kohesionatu bat ere islatzen du, lagundua eta babestua sentitzen dena. Gipuzkoako Foru Aldunditik pertsonen ongizatea jarri dugu gure ekintzaren erdigunean, ez bakarrik asistentziaren ikuspegitik, baita komunitatearen ikuspegitik ere. Diagnosi horrek berresten digu beharrezkoa dela pertsonak eta komunitatea ardatz dituzten komunitate zaintzaileak eta politika publikoak eraikitzen jarraitzea. ”

Ardura sozialei dagokienez, etxebizitza da arazo nagusia oraindik ere, inkestatuen % 50,2k aipatzen baitu; ondoren, langabezia ( % 25,2) eta osasuna ( % 20,4) daude. "Gai horiek gure gizartearentzat lehentasunezkoak izaten jarraitzen badute ere, langabeziari eta osasunari buruzko kezkan beheranzko joera ikusten da abenduko Soziometroarekin alderatuz gero", azpimarratu du Berasaluzek.

Balorazio politikoa

Azterlanak balorazio instituzional eta politikoa ere jorratzen du, non Foru Aldundia lehen aldiz baloraziorik onena duen erakundea baiten 5,57 punturekin, ondoren udalak daude 5,48rekin, Eusko Jaurlaritza 5,42rekin eta, azkenik, Espainiako Gobernua 3,99rekin. Eider Mendoza diputatu nagusiaren ezagutza mailak ere gora egin du, abenduko neurketaz geroztik ehuneko lau puntu igo baita, % 37,7tik % 41,6ra (ezagutza espontaneoa). Eider Mendoza diputatu nagusiak 5,83 puntuko batez besteko balorazioa jaso du, aurreko aldiko puntuazioa hobetuz.

Irune Berasaluzek nabarmendu duenez, "herritarrek aintzat hartzen dituzte Gipuzkoan egonkortasun ekonomikoa eta politikoa bermatzeko foru gobernuaren ahaleginak", eta liskar politikoak saihesteari ematen zaion garrantzia azpimarratu du, 10etik 7,19 puntuko balorazioa baitu aspektu honek. % 59,7k uste du gobernu berriaren ekintzek dezente laguntzen dutela lurraldearen hobekuntza orokorrean. Foru bozeramaileak azpimarratu duenez, “lankidetza eta akordioa legegintzaldi honen ezaugarri dira”. “Egunero lan egiten dugu aniztasunetik gobernatzea posible dela erakusteko, eta gaur egun argi eta garbi esan dezakegu hori lortzen ari garela, eta politika egiteko modu hori positiboki ikusten ari direla gipuzkoarrak”, gaineratu du. “Ideologikoki oso desberdinak diren alderdiekin akordio garrantzitsuak lortu ditugu, eta erakutsi dugu guztion ongia lehenesten denean posible dela desberdintasunetik aurrera egitea. Hor daude, adibide gisa, Alderdi Popularrarekin adostutako aurrekontuak edo Podemosekin adostutako erreforma fiskala ”.

Hauteskundeei dagokienez, Soziometroaren arabera, EH Bilduk % 40 lortuko luke, EAJ-PNVk % 31,9, PSE-EEk % 15,1, PPk % 6 eta Elkarrekin Podemosek % 4,8. Ordezkaritzan, EH Bilduk 23 batzarkide lortuko lituzke, EAJ-PNVk 17, PSE-EEk 7, PPk 3 eta Elkarrekin Podemosek 1, eta gobernu koaliziorako 24 batzarkideren gehiengoa egonkor mantenduko litzateke.

Azkenik, herritarrek politikan duten konfiantzari dagokionez, % 69,8k nolabaiteko mesfidantza adierazten jarraitzen duten arren, agerian geratzen da konfiantza pixkanaka berreskuratzen ari dela, 2022an % 12 izatetik gaur egun % 26 izatera igarota. Berasaluzek adierazi duenez, "datu horiek eredu politiko irekiago, gardenago eta hurbilagoaren alde lan egitera bultzatzen gaituzte, herritarren konfiantza pixkanaka berreskuratuko duena".