MUBIL Centerek ateak irekiko dizkie herritarrei larunbat honetan, mugikortasun laborategietara bisita gidatuak eskainiz.

Datorren larunbatean, maiatzak 24, MUBIL Centerrek jardunaldi berezi bat antolatuko du, herritarrei zuzendutako bisita gidatuak eskainiz. Eskuzaitzetan (Donostia) kokatua eta maiatzaren 12an inauguratua, zentroak Gipuzkoa eta Euskadi mugikortasun adimentsu eta iraunkorrean Europako erreferentetzat duen azpiegitura estrategiko bat bertatik bertara ezagutzeko aukera paregabea emango die bisitariei.

Bisitak 10:00etatik aurrera hasiko dira, 50 laguneko taldetan eta 30 minutu inguru iraungo dute. Parte hartu nahi dutenek aldez aurretik eman beharko dute izena MUBILen webgunean nahi duten ordu-tartea hautatuz.

Bisita gidatuei esker, bisitariek zentroko abangoardiako hiru saiakuntza-laborategi teknologiko nagusiak ezagutzeko aukera izango dute:

­ Biltegiratze elektrikoko laborategia: segurtasun eta fidagarritasun estandar zorrotzenetan gelaxkak, moduluak eta bateria-sistemak probatzeko.

­ Trakzio elektrikoko laborategia: automobilgintzaren eta garraio astunaren sektorerako motor, inbertsore eta transmisio-sistemak probatzeko.

­ Hidrogeno-pilen laborategia: hidrogenotik abiatuta elektrizitatea sortzeko sistemak probatzeko eta balioztatzeko azpiegitura.

Laborategi hauek Europan bakarra den ekosistema teknologikoa osatzen dute eta dagoeneko IRIZAR, McLaren, IVECO eta Emotors bezalako lehen mailako bezeroen interesa piztu dute, mugikortasun aurreratuan funtsezko soluzioak garatu eta baliozkotzeko MUBILen azpiegitura teknologikoa erabiliz.

Bestalde, datozen egunetan, MUBIL Centerreko instalazioak lanbide heziketako ikasleek, unibertsitateek, ingeniaritza eskoletako ikasleek, Gipuzkoako Foru Aldundiko langileek, Batzar Nagusietako eta Eusko Legebiltzarreko ordezkariek, baita mugikortasunaren sektoreko enpresek ere bisitatuko dituzte, MUBIL Center industriaren, akademiaren eta erakundeen arteko topagune sendo bilakatuz.

Entsegu-banku gisa duen funtzioaz gain, MUBILek teknologia herritarrengana hurbiltzeko eta berrikuntzaren eta lurraldearen garapen iraunkorraren arteko lotura sustatzeko duen konpromisoa azpimarratzen du jardunaldi honek. Zentroaren irekierak, era berean, jarduera-agenda trinko baten hasiera markatzen du, proiektu estrategikoak eta nazioarteko inbertsioa erakartzea helburu duena, Gipuzkoa etorkizuneko mugikortasunaren funtsezko nodo gisa sendotzeko bidean.

MUBIL Gipuzkoako Foru Aldundiaren apustu estrategiko baten emaitza da, 2018an abiatutakoa, etorkizunari aurrea hartzeko eta lurraldea espezializazio handiko sektoreetan kokatzeko helburuarekin. Estrategia honek aukera berriak bultzatzen ditu eta aldi berean enpresa-sare tradizionalari laguntzen dio, enplegua, lehiakortasuna eta berrikuntza sustatuz, Gipuzkoako ekosistema industrialaren garapenerako funtsezkoak diren esparruetan. Informazio gehiago eta izen emateak hemen: https://www.mubil.eus/eu/bisita-gidatuen-jardunaldia