Mugikortasuneko, Turismoeko eta Lurralde Antolaketako diputatua, Azahara Domínguez, Errenteriako Don Bosco LHko zentroan izan da, iaz Lanbide Heziketako ikastetxeetara egindako bisita-txandari jarraipena emanez

Mugikortasuneko, Turismoko eta Lurralde Antolaketako diputatua den Azahara Domínguezek Errenteriako Don Bosco Lanbide Heziketako zentroa bisitatu du ostiral honetan. Horrela, diputatuak berriro ekin dio joan den urtetik mugikortasunarekin eta turismoarekin lotutako graduak ematen dituzten zentroetara egiten ari den bisita-txandari. Diputatuak adierazi duen bezala, bisita hauen helburua da "diagnostiko bat izatea Gipuzkoako mugikortasun-industriaren egoerari buruz, lurraldean sortzen diren profil profesionalei buruz eta dauden beharrei buruz".
Juan Carlos Lizarbe ikastetxeko zuzendariak, bertako arduradun eta irakasleek, Kepa Altube Ikaslan Gipuzkoako kudeatzaile eta koordinatzaileak eta Aizpea Otaegi Errenteriako alkateak parte hartu dute bisitan. Diputatuak zentroaren instalazioak ezagutzeko aukera izan du, baita tailerra bisitatzeko ere. Bertan, ikasleek ibilgailuen eta motorren mantentze-lanetan trebatzen dira eta simulagailua probatu dute, motorrean ibiltzen ikasteko. Era berean, ikasleek Ikaslan Gipuzkoarekin batera mugikortasun iraunkorragoa sustatzeko helburuarekin garatutako aplikazio baten berri jaso du.
Azahara Domínguezek eskerrak eman dizkie ikastetxeko arduradunei etorkizuneko profesionalen prestakuntzan egindako lanagatik, eta ikasleei dei egin die beren karrera profesionalak lurraldean garatzeko presta daitezen.
Ez da diputatua Don Boscorekin biltzen den lehen aldia; izan ere, 2024ko abenduan, Mugikortasun Seguru eta Jasangarriko Goi Zikloko ikasle talde batek Lurraldebus Gunearen instalazioak bisitatu zituen, eta bertatik bertara ezagutu zuten espazio horretan egiten den lana eta Mugikortasun Zuzendaritzak lantzen dituen estrategia nagusiak.
"Mugikortasun jasangarria ardatz estrategikoa da Gipuzkoarentzat, eta ikusi besterik ez dago zer ahalegin egiten ari garen aurrekontuetan garraio publikoaren erabilera sustatzeko, 61 milioi euro bideratuko baitizkiogu Lurraldebusi 2025ean. Garraio publikoak ez zuen inoiz hainbesteko aurrekonturik eta bidaiari kopururik izan. Horregatik, funtsezkoa da ondo prestatutako profesionalak izatea, beren karrera profesionalak hemen garatzeko baldintza ezin hobeak dituztenak, mugikortasun iraunkorragoa, berritzaileagoa eta egungo eta etorkizuneko erronkei hobeto egokitua lortzeko urratsak ematen jarraitu ahal izateko", nabarmendu du diputatuak, eta gaineratu du "sektoreari entzutea eta LHko ikastetxeen gaitasunak gure enpresen benetako beharrekin lotzea funtsezkoa dela, ez bakarrik etorkizuneko mugikortasun iraunkorra arrakastaz eraiki dezagun, baizik eta lurraldea ehuntzeko eta talentua atxikitzeko".
Bestalde, ikastetxeko zuzendari den Juan Karlos Lizarbek azaldu duenez, Don Bosco Lanbide Heziketako Ikastetxe Integratua "zentro publikoa da, eta ekoizpen-sektorearen eta gizartearen inguruko beharrei erantzuten saiatzen da". "Testuinguru horretan jarri zen abian 2022-2023 ikasturtean Mugikortasun Seguru eta Iraunkorrerako Prestakuntza zikloa. Ziklo honetako ikasleek autoeskolako irakasle eta zuzendari titulua lortzen dute eta udaletan edo beste erakunde batzuetan mugikortasun-teknikari gisa lan egiteko aukera dute", adierazi du. "Orain arte, bi promozio atera dira, eta oso ondo txertatu dira autoeskolen sektorean, beste sektore batzuetan bezala profesional kualifikatuen premia handia baitute, bai eta Oarsoaldeko udaletan, mugakideetan eta beste erakunde batzuetan ere", adierazi du, eta nabarmendu du Don Bosco dela prestakuntza hori eskaintzen duen Gipuzkoako centro bakarra.