Mugikortasuneko, Turismoko eta Lurralde Antolaketako Departamentuak Bidasoako erreklamazio historiko bati erantzun dio, Hondarribia eta Irun eta Donostiako ospitale-eremuaren eta Miramon arteko linea zuzen berri batekin

Azahara Domínguez Mugikortasuneko, Turismoko eta Lurralde Antolaketako diputatuak jakinarazi duenez, ekainaren 20tik aurrera, ostirala, "Hondarribiak eta Irunek Lurraldebuseko linea berri bat izango dute, Donostiako ospitaleekin lotuko dituena, eta, horrela, Bidasoa eskualdeko herritarrek azkenaldian egin dituzten eskarietako bati erantzungo diote".
Diputatuak jakinarazi duenez, linea berri horrek E29 (Hondarribia>Irun>Donostia (Ospitaleak) izena izango du, eta ekainaren 20tik (ostirala) aurrera funtzionatuko du, astelehenetik ostiralera.
Azahara Domínguez Irungo alkate Cristina Labordarekin, Hondarribiko alkate Igor Enparanekin eta Bidasoako Minbiziaren aurkako Elkarteko, Irungo Auzo Elkarteen Federazioko eta Makila Elkarteko ordezkariekin bildu da, zerbitzu berri hau abian jarri dela lehen eskutik jakinarazteko eta Gipuzkoan garraio publikoa etengabe hobetzen laguntzeko duten jarrera eskertzeko.
Zehazki, Hondarribitik abiatzen den autobusa 7: 00etan abiatuko da, eta 8:10 eta 17:10 bitartean orduoro zerbitzu bat izango du (14:10ean izan ezik, orduan autobusak 14:00etara aurreratuko baitu irteera, langileen txanda-aldaketetara hobeto egokitzeko). Gainera, autobus bat egongo da 19:10ean eta beste bat 21:00etan.
Linea hau Ama Guadalupeko Ikastetxetik abiatuko da eta Sabino Arana, Amute eta Mendelu Kalean gelditu ondoren, Gurutze Gorritik sartuko da Irunera. Bertan zortzi geldialdi egingo ditu Kolon Pasealekuan, Gipuzkoa Etorbidean, Elizatxo Hiribidean (lau geraleku) eta Letxunborron. Handik, G-20etik abiatuko da Gipuzkoako hiriburura, eta Loiolako Erriberatik sartuko da Donostian., ospitaleetara igoko da, Poliklinikatik igaroko da eta Mikeletegiraino iritsiko da, Miramongo parke teknologikoan. Alderantziz, ibilbidea honako hau izango da: Mikeletegi pasealekua, Miramon, Onkologikoa, Ospitaleak, Illunbe, Arcco, Toribio Alzaga eta Bartzelona etorbidea Donostian; Letxunborro, Elizatxo, Luis Mariano, Colon eta Hondarribia kalea Irunen; eta Mendelu kalea, Amute, Aireportua (kanpoaldea), Sabino Arana eta Ama Guadalupekoa Ikastetxea Hondarribian. Ibilbide osoa, lehenengo eta azken geltokiaren artean, 45 minutukoa izango da.
Azahara Domínguezek azpimarratu duenez, linea horrek osasun-arrazoiengatik ospitalera joan behar duten pertsona guztiei emango die zerbitzua, eta ospitaleetako eta Miramongo teknologia-parkeko langileei aukera jasangarria, erosoa eta eskuragarria eskainiko die beren lanpostuetara iristeko.
Era berean, gogorarazi du konexio hori "aurreikusita dagoela Lurraldebusek Oarsoaldea-Bidasoan egingo duen kontzesio berrian", baina azaldu du kontzesio berri bat abian jartzeak dakarren administrazio-prozesu luzeak, eta kanpo-kontsulten zentro berriaren obrak hasi zirenetik Donostiako ospitale-gunean bizi den egoera konplexuak eta aparkalekua ixteak eragin dituen aparkaleku-arazoek "bultzatu gaituztela linea berria martxan jartzea aurreratzeko erabakia hartzera, Hondarribiko eta Irungo herritarrekin dugun konpromisoa betez. Izan ere, badakigu oso zerbitzu eskatua dela eta oso beharrezkoa dela bi herri hauentzat".
“Linea berri honekin, beste behin ere, aldarrikapen historiko bati eta Bidasoa eskualdeko bizilagunen benetako behar bati erantzuten diogu. Izan ere, datorren ekainaren 20tik aurrera garraio publikoko zerbitzu zuzena izango dute Donostiako puntu honekin, eta horrek mugikortasun askoz jasangarriagoa eta eraginkorragoa bermatuko du milaka pertsonarentzat. Gainera, ibilgailu pribaturik ez dutenek azkar, modu jasangarrian eta prezio eskuragarrian konektatu ahal izango dute ospitaleak eta Miramon bezalako gune garrantzitsu batekin. Garraio publikoa etengabe hobetzeko lanean jarraituko dugu, gipuzkoar bakar batek ere ibilgailu pribaturik eduki behar ez dezan bere bizitza garatu ahal izateko”, gehitu du. 
Bestalde, Irungo alkateak adierazi du linea berri hau martxan jartzea "oso albiste positiboa" dela. "Garraio publikoak ibilgailu partikularraren alternatiba erreala izan behar du, eta linea hau zentzu horretan doa. Mugikortasuna hobetzeaz gain, herritarren behar argiari erantzuten dio, eta, beraz, ziur nago herritarrek, osasun-langileek eta Miramonen lan egiten duten Irungo langileek harrera ona izango duten zerbitzu berri bat izango dela", adierazi du.
Azkenik, Igor Enparan Hondarribiko Alkateak esan duenez, “herritarrengandik jaso ditugun eskaeraren aurrean Hondarribiko Udaletik eskaera horien transmisioa egin genuen Foru Aldundira. Beharrezkoa zen zerbait dela uste dugu, eta aspaldiko behar honi erantzuna ematea oso pozgarria da”. “Argi daukagu bai hospitaleko  langile bai eta gure herritarrentzat ere bizitza eroso eta jasangarriago bat ekarriko duela. Hondarribiko Udala neurri hauek lortu eta hobetzeko lanean ari da eta hala jarraituko du. Pertsonei bere egunerokotasuna erreztu egin behar diegu, eta gainera jasangarritasunaren handitzean ezinbesteko lana egin behar dugu”, bukatu du.