Mugikortasuneko, Turismoko eta Lurralde Antolaketako diputatua, Azahara Domínguez, Zarauzko KL katealegaia lantegian izan da

Mugikortasuneko, Turismoko eta Lurralde Antolaketako diputatua den Azahara Domínguezek KL katealegaiak Zarautzen duen lantegi industriala bisitatu du aste honetan. Zentro horrek 75 langile ditu gaur egun, eta hedatzen ari da.
Xabier Txurruka Zarauzko alkateak, Lore Suárez KL katealegaiako Lurralde Antolamenduko zuzendari eta administrazio kontseiluko kideak, Pablo Núñez enpresako zuzendari nagusiak, Jaione Zubizarreta pertsonen arloko arduradunak, Iñaki Iraola arlo tekniko-industrialeko arduradunak eta Beñat Aisa KL katealegaiako planta arduradunak ere parte hartu dute bisitan. Diputatuak enpresaren filosofia, Zarauzko produkzio-zentroan egiten den lana eta hemen lantzen diren industria-proiektuak bertatik bertara ezagutzeko aukera izan du. Azahara Domínguezek eskerrak eman dizkio KL Katealegaiari Gipuzkoan desgaitasuna duten pertsonekin edo gizarte-bazterkeriako arriskuan daudenekin egiten duen gizarteratzearen eta laneratzearen alde egindako lanagatik.
Izan ere, KL katealegaia bere jarduera-sektoreetan liderrak diren enpresen partner industriala da, besteak beste, mugikortasunari lotutako lehen mailako enpresa gipuzkoarrena, eta horiekin lan egiten du Azahara Dominguezek gidatzen duen departamentuak ere. Ildo horretan, Zarauzko plantan, esaterako, neurriko soluzioen industria-zerbitzu integrala eskaintzen da serie ertain eta altuen produktu errepikaria fabrikatzeko, hainbat sektoretan esperientzia handia duena.

Gizarte-bokazio argia
KL katealegaia, interes sozialeko irabazi-asmorik gabeko lan-sozietate bat da, bertako kide diren pertsonen jabetzakoa. Pablo Núñez zuzendari nagusiak nabarmendu duenez, KL katealegaiaren helburua da "pertsonen enplegagarritasuna eta, beraz, bizi-kalitatea hobetzea, lankidetzan ari garen industria-enpresen garapena hobetzea, eta Gipuzkoan gizartearen kohesioa eta aurrerapena bultzatzea". "KL katealegaiaren apustua da kalitatezko enplegua sortzea desgaitasuna duten eta baztertuta geratzeko arriskuan dauden pertsonentzat. Sarean lan egiten dugu enpresa industrialekin, erakundeekin, elkarteekin eta gizarte eta toki entitateekin, gizarte hobe baterako ekarpena egiteko ", berretsi du.
Diputatuak balioa eman dio KL katealegaian desgaitasuna duten eta baztertuta geratzeko arriskuan dauden pertsonen gizarteratzearen eta laneratzearen alde egiten den lanari: "Gipuzkoa puntako eta erreferentziazko industria-muskulua duen lurraldea da, eta KL Katealegaian, besteak beste, lan egiten duten langileez elikatzen diren munduko enpresa liderrak ditu. Horregatik, oso garrantzitsua da egiten KL Katealegaia bezelako enpresek egiten duten lana bertatik bertara ezagutzea, funtsezkoa baita gure produktuak mundu osoan zehar esportatzeko eta lurralde lehiakorragoa izateko. KL katealegaia bezalako enpresek Gipuzkoa lurralde bidezkoagoa eta berdintasunezkoagoa izatea eragiten dute, non pertsonek, beren gaitasunak alde batera utzita, bizitza garatzeko aukera duten. Mugikortasuneko, Turismoko eta Lurralde Antolaketako Departamentuan espiritu horrekin bat gatoz, eta gure herritarren artean aukera-berdintasuna sortzeko lan egiten dugu, Gipuzkoa inor atzean geratzen ez den lurralde bizigarriago bihurtuz".
Azkenik, Xabier Txurruka Zarauzko alkateak honako hau nabarmendu du: "Katealegaia garrantzi handiko enpresa da, bere jarduera industriala gero eta handiagoa delako eta eskualdean desgaitasuna duten eta gizarte-bazterketa jasateko arriskuan dauden pertsonen enplegua hobetu delako. Lan handia egiten du Zarauzko ekonomia sustatzeko eta pertsona guztien gizarteratzea eta laneratzea bultzatzeko".