Jasangarritasunak eta EHUk ekonomia zirkularra sustatzeko lankidetza indartu dute, bi hitzarmen berriren bidez

José Ignacio Asensio: “Ezagutzaren, zientziaren eta erakundeen arteko lankidetzaren aldeko apustua da Gipuzkoan eraikitzen ari garen trantsizio ekologikoaren oinarria. 2020an sortu zenetik, Ekonomia Zirkularraren Gela eta babesten ditugun ikerketa proiektuak gizarte gisa behar dugun aldaketarako hazia dira”.

Gipuzkoako Foru Aldundiko Jasangarritasun Departamentuak eta Euskal Herriko Unibertsitateak (EHU) ekonomia zirkularra sustatzeko duten aliantza indartu dute gaur. Horretarako, bi lankidetza-hitzarmen berri sinatu dituzte, prestakuntza, ikerketa aplikatua eta Gipuzkoako produkzio-sarearekiko lankidetza indartzeko. Sinadura Gipuzkoako Ingeniaritza Eskolako Ekonomia Zirkularreko Gelan egin da, José Ignacio Asensio Jasangarritasuneko foru-diputatua buru duen bisita instituzional batean, EHUko Gipuzkoako Campuseko errektoreorde Juana Goizuetarekin batera.

Bisitan, Asensiok nabarmendu duenez, “ezagutzaren, zientziaren eta erakundeen arteko lankidetzaren aldeko apustua da Gipuzkoan eraikitzen ari garen trantsizio ekologikoaren oinarria. 2020an sortu zenetik, Ekonomia Zirkularraren Gela eta babesten ditugun ikerketa proiektuak gizarte gisa behar dugun aldaketarako hazia dira”.

Juana Goizuetak azpimarratu duenez, “EHU herritarren zerbitzura dago, eta ezagutzan eta berrikuntzan oinarritutako gizartea eraikitzeko lan egiten du. Horregatik, bere gain hartzen du trantsizio ekologikoak gaur egun duen erronka erabakigarria. Ekonomia Zirkularreko Gelari eta gaur Gipuzkoako Ingeniaritza Eskolan biltzen gaituen ikerketa proiektuari laguntzea funtsezkoa da jasangarritasunerantz aurrera egitea ahalbidetuko duten tresnak sortzeko”.

Alde batetik, Ekonomia Zirkularreko Unibertsitate-Enpresa Gela garatzeko hitzarmena sinatu dute Asensiok eta Iker Laskurain Ingeniaritza Eskolako zuzendariak. Aldundiak 6.000 euroko ekarpena egin du. Ikasgela hori unibertsitate-eremuaren eta Gipuzkoako produkzio-sarearen arteko lankidetzarako gunea da, eta talentu gaztea, prestakuntza espezializatua eta ekonomia zirkularraren erronken eta aukeren inguruko ikerketa-lanak sustatzera bideratuta dago.

Hitzarmenak, besteak beste, honako ekintza hauek jasotzen ditu: ekonomia zirkularrean zentratutako jardunaldiak, saioak eta eztabaida-foroak batera antolatzea; sektoreari lotutako gradu eta master amaierako lanak garatzea; ikasleek lurraldean eragina duten benetako proiektuetan parte hartzea; edo emaitzak argitalpen eta ingurune digitaletan zabaltzea.

Azken helburua ikasleen enplegagarritasuna hobetzea, ikerketa aplikatua sustatzea eta ezagutza akademikoaren eta Gipuzkoako produkzio-ekosistemaren beharren arteko zubiak eraikitzea da.

Bestalde, Gipuzkoako Campuseko errektoreorde Juana Goizuetak eta Asensio diputatuak hondakinetatik abiatuta material konposatu berriak garatzeko ikerketarako laguntza-hitzarmena sinatu dute, 40.000 euroko zuzkidurarekin. EHUko ‘Materialak+Teknologiak' ikerketa taldeak gidatutako proiektuak tokiko hondakinen balorizazioan aurrera egitea du helburu.

Proiektuaren esparruan garatuko den ikerketak berekin dakar material konposatu berrien garapenean aurrera egitea, matrize birziklatu biooinarrituekin edo biodegradagarriekin, bai eta tokiko indargarriak ere, ardi latxaren artilea eta ehunen sektoreko ehun birziklatuak barne. Material horiek Gipuzkoako Ingeniaritza Eskolak parte hartzen duen MotoStudent proiektuko moto elektrikoaren karenatua fabrikatzeko aplikazio potentziala dute, eta, gainera, prestazio handiko ehun teknikoak eta arrantza jasangarriago baterako material biodegradagarriak garatzeko duten erabilera ebaluatuko da.

Ikerketa ildo hori bat dator Gipuzkoako Hiri Hondakinak Kudeatzeko Plan Orokorraren (GHHKPO 2019-2030) helburuekin, eta karbono gutxiko ekonomia zirkular eta berritzaile baten aldeko apustuarekin, lurraldeko sektore giltzarrietan kalitatezko enplegua sortzeko gai izango dena.