Kirolgi Fundazioak eta Rural Kutxaren Gizarte Ekintzak lankidetza hitzarmena sinatu dute kirol-talentua bultzatzeko bekak sustatzeko

Kirolgi Fundazioak eta Rural Kutxaren Gizarte Ekintzak lankidetza hitzarmen bat sinatu dute "Kirol-talentua bultzatzeko Rural Kutxa bekak" abian jartzeko. Ekimen horren helburua da goi mailako kirol jarduera eta prestakuntza akademikoa bateragarri egiten dituzten Gipuzkoako kirolari gazteei laguntzea.

Goizane Álvarezek, Kirolgi Fundazioko lehendakari eta Kultura eta Kiroletako diputatuak, ekimen honen garrantzia azpimarratu du: "Gipuzkoan irmoki sinesten dugu kirolean, gizartea eraldatzeko, aukera-berdintasunerako eta garapen pertsonalerako tresna gisa. Hitzarmen honen bidez, beste urrats bat egiten dugu gure talentu gazteei laguntzeko, kirolari gisa hazi ahal izan daitezen beren prestakuntza akademikoari uko egin gabe. Oreka hori funtsezkoa da ibilbide sendoak eta etorkizun justuagoa eta bidezkoagoa eraikitzeko Gipuzkoako gazteentzat."

Bestalde, Javier Martínez Rural Kutxako Gizarte Ekintzako arduradunak adierazi duenez, “aliantza honek tokiko talentuarekin dugun konpromisoa berresten du, kirolari gazteei eta haien familiei bide zorrotz bezain itxaropentsuan lagunduz. Beken hauen bidez, esfortzuaren kultura aintzatetsi nahi da, bai kirol-merezimenduengatik, bai prestakuntza akademikoaren alde egiten duten apustuagatik. Horrek autonomia handiagoa eta etorkizuneko aukerak bermatzen dizkie. Pozten gaitu bere hazkundearen parte aktiboa izateak eta Gipuzkoari poz asko ekarriko dizkion belaunaldi bat sortzen laguntzeak”.

Bekak, gehienez ere, 1.000 eurokoak izango dira kirolari bakoitzeko, eta bi laguntza-ildotan egituratzen dira: 500 euroko zuzkidura ekonomikoa kirolerako eta 500 euroko zuzkidura ekonomikoa prestakuntza akademikorako. Guztira, 30 kirolarik jaso ahal izango dute laguntza hori.

Bekaren onuradun izateko, ezinbestekoa izango da Gipuzkoako Foru Aldundiak talentuko kirolari izendatu izana 2025ean. Gainera, laguntzaren zati akademikoa eskuratu ahal izateko, 2024-2025 ikasturtean DBHko, Batxilergoko, Lanbide Heziketako edo Unibertsitateko ikasketa ofizialetan matrikulatuta egon beharko da.

Bekaren zenbatekoa kirolari onuraduna titular den Rural Kutxako kontu batean ordainduko da. Horretarako, matrikularen egiaztagiria eta kontuaren titulartasunaren ziurtagiria aurkeztu beharko dituzte.