Naturklimak ohartarazi du Gipuzkoako 3 sektore estrategikotatik 1 mugan dagoela elkarri lotutako klima-arriskuengatik

Klima-aldaketarekiko Inpaktuari eta Kalteberatasunari buruzko VI. Txostenak lehen aldiz aztertu ditu lurraldeko sektore guztiei eragiten dieten arriskuen arteko interdependentziak.

Ekosistema-zerbitzuen galera, funtsezko hiri-sistemen kalteak edo hiri-uren eskasia bezalako fenomenoek sektore guztien arteko inpaktuak areagotzen dituzten nodo zentral gisa jarduten dute.

José Ignacio Asensio: “Klima-larrialdia bizi dugu. Presente dago. Orain da. Bero-bolada bakoitzak pertsonen osasunari, urari, energiari, ekonomiari eta bizitzari eragiten die. Txosten honek erakusten digu, datu zehatzekin, non jardun behar dugun premiaz eta koordinazioz”.

Gipuzkoako batez besteko tenperatura 0,35ºC igo da hamarkada bakoitzeko 1971az geroztik, eta azken hamar urteetako bost erregistratutako beroenen artean daude. Klima-aldaketarekiko duen eraginari eta kalteberatasunari buruzko VI. Txostenaren arabera (gaur aurkeztu du Gipuzkoako Foru Aldundiko Jasangarritasun Departamentuak), lurraldeko hiru sektore estrategikotako batek arrisku klimatiko interkonektatuak ditu, sektoreen artean hedatzeko eta osasunean, ekonomian eta funtsezko zerbitzuetan dituen inpaktuak handitzeko gai direnak.

José Ignacio Asensiok, Jasangarritasuneko diputatu eta Naturklimako presidenteak, azpimarratu duenez, “klima-larrialdia bizi dugu. Presente dago. Orain da. Bero-bolada bakoitzak pertsonen osasunari, urari, energiari, ekonomiari eta bizitzari eragiten die. Txosten honek erakusten digu, datu zehatzekin, non jardun behar dugun premiaz eta koordinazioz”.

Azterlanak 30 arrisku giltzarri aztertzen ditu, 12 sektore estrategikotan banatuta: ura eta baliabide hidrikoak, turismoa, industria, zerbitzuak eta finantza-sektorea. Grafoen teorian oinarritutako metodologia berritzaileari esker, arriskuak nola konektatzen eta hedatzen diren identifika daiteke: nodo bakoitzak arrisku bat irudikatzen du, eta lotura bakoitzak haien arteko eragina adierazten du. Horri esker, inpaktuak ugaldu daitezkeen eta katean efektuak eragin ditzaketen puntu kritikoak aurkitu ahal izan dira.

Txostenaren aurkikuntza nagusiak

Aurkikuntza garrantzitsuenen artean, txostenak erakusten du finantza-sektoreak, turismoa, hiri-ingurunea eta industria eta zerbitzuak direla beste sektore batzuetan sortutako arriskuekiko kalteberenak; kostaldearen, uraren eta hiri-ingurunearen sektoreek, berriz, ahalmen berezia dute inpaktuak lurraldeko gainerako sektoreetara hedatzeko. Era berean, ekosistema-zerbitzuak galtzea, funtsezko hiri-sistemak kaltetzea eta hiri-uren eskasia bezalako arriskuak beste arrisku batzuen ondorioak konektatzen eta zabaltzen dituzten nodo zentral gisa identifikatzen dira.

Asensiok azpimarratu duenez, “txosten hau ez da azterlan zientifiko hutsa. Gobernantza-tresna bat da, aurrea hartzeko, egokitzapen-politikak koordinatzeko eta pertsonak, ekonomia eta ekosistemak modu integralean babesteko aukera ematen diguna”. Gainera, foru-arduradunak nabarmendu du erakunde bakar batek ere ezin diola aurre egin klima-larrialdiari bakarrik: “planeta zaintzeko modurik onena pertsonak zaintzea da. Aurrea hartu behar dugu, koordinazioa eta aliantzak sortu behar ditugu”.

VI. Txostenak Jasangarritasun Departamentuaren estrategia indartzen du. Estrategia horrek deskarbonizazio-planak, energia-komunitateak, ekonomia zirkularra eta kostaldearen babesa konbinatzen ditu, Gipuzkoa klima-arriskuen aurrean prestatzeko eta lurralde erresilienteagoa eta jasangarriagoa bermatzeko.