NOLA EGINGO DUGU?

Jarduera artistiko kulturalen katalogo bat osatuko dugu, kalitatezkoa eta oinarri pedagogikoa duena

Kultura Eskola martxan jartzeko prozesua lurraldeko kultura sektoreari zuzendutako deialdi batetik abiatuko da. Deialdi horrek proiektuen katalogo bat osatzeko balioko digu. Proposamenak irizpide artistiko, pedagogiko eta ekonomikoen arabera baloratuko dira, baina baita euskarazko eskaintza lehenetsiz eta edukiek genero-berdintasuna eta inklusio printzipioak bermatzen eta sustatzen dituztela zainduz ere.

Balorazioa gainditzen duten proiektuak Derrigorrezko Bigarren Hezkuntza eta Oinarrizko Lanbide Heziketa ematen duten Gipuzkoako ikastetxeei eskainiko zaizkien jardueren katalogoan sartuko dira.

Ikastetxeek proposamenak aukeratuko dituzte katalogotik

Ikastetxeei zuzendutako deialdi batek ezarriko ditu jardueretara sartzeko baldintzak. Baldintza horiei esker, jardueren banaketa ekitatiboa egin ahal izango da, irizpide kuantitatiboetan oinarrituta, zentro bakoitzean egin beharreko jardueren kopurua mugatuz, lurralde-oreka zainduz eta kultura-eremu eta diziplina artistiko guztiak ordezkatuta egotea lehenetsiz. Katalogoko jarduera bakoitzerako muga bat ere ezarriko du, jarduera horietako batean kontzentraziorik ez gertatzeko.

Zentroei jarduerak esleitu ondoren, Kultura Zuzendaritzak hautatutako jardueren eragile sustatzaileak kontratatuko ditu, katalogoan ezarritako prezioaren eta egin beharreko jardueren kopuruaren arabera, eta egin ahala dagozkion zenbatekoak ordainduko ditu.

Jarduerak ikasturtean zehar egingo dira, eskola-ordutegiaren barruan, ikasgelaren barruan zein kanpoan, jarduera motaren arabera, eta betiere ikastetxearen komenigarritasunaren eta jarduera bakoitzaren ezaugarrien arabera.

Lankidetzan: kultur eragileak, ikastetxeak eta herri erakundeak

Garrantzitsua izango da irakasleen eta kultura eragileen arteko lankidetza, jarduerak ikasleen beharretara eta ezaugarrietara egokituta egin daitezen lortzeko. Jarduerak egin ondoren, ikasleen, irakasleen eta eragileen balorazioa eskatuko da. Horrela, bitartekaritza lanak bi norabideetan funtzionatuko du, eta programa egokitzen eta fintzen joatea ahalbidetuko du, hurrengo ekitaldietan hobekuntza kualitatiboa lortzeko.