Atzealdea

LEPO ETA SUSTRAIKO TUMOREA

LEPO ETA SUSTRAIKO TUMOREA (Agrobacterium tumefaciens o A. rhizogenes)

Mundu osora zabaldutako bakterio-gaitz honek, batez ere mintegietan eragiten ditu kalteak. Garrantzia bakterioak sortutako tumore-kopuruaren, tamainaren eta kokalekuaren araberakoa da, eta sagarrondo gazteei gehiago erasaten die.

Sintomak eta biologia

Gaitzaren ezaugarri den sintoma tumoreak sortzea da, lepoan batez ere, nahiz eta sustraietan ere sortzen diren (eta, gutxiagotan, zuhaitzaren enborrean ere bai).

Hasieran tumoreak kolore argiko tontor txikiak dira, bigunak eta azal leunekoak, eta sintoma hauek intsektuek, nematodoek, sustraitxoak ateratzeak eta abarrek sortutako antzekoekin nahas daitezke. Gero zezidio hauek garatu egiten dira eta tumore biribilak osatzen dituzte, 1 -– 20 cm diametro bitartekoak, marroi-kolorekoak, azal irregularrekoak eta egitura gogorrekoak.

A. tumefaciens bakterioa lurrean bizi da eta ostalariraino honek dituen zaurietatik sartzen da. Patogenoa distantzia laburretara laborantzako lanen bidez transmititzen da: ureztaketaz, kutsatutako makineriaz eta abarrez. Baita eguraldi-faktoreez ere. Distantzia luzera, ordea, kutsatutako materialaz transmititzen da.

Bakterioa hazteko tenperatura onena 25 eta 30 ºC bitartekoa da, baina 38 ºC-rainoko tenperaturak ere onartzen ditu. 18 ºC baino tenperatura baxuagoetan hazkundea asko moteltzen da. Horregatik bere jarduera udazken-neguan eten egiten du eta gero udaberrian berriz ekiten dio.

Borroka

Tratamendu kimikoen bidez gaitza ongi kontrolatzeko modurik ez dago.

Emaitza onenak prebentzio-neurriak hartuta lortzen dira: material osasuntsua erabilita eta haziak, aldaxkak eta landareak desinfektatuta. Ezer gutxi dakigu gaitz honetan barietateek eta patroiek duten portaeraz.

  • Agrobacterium-en erasoak eragindako tumorea. Agrobacterium-en erasoak eragindako tumorea.
  • Agrobacterium zezidioa sustraitxoan. Agrobacterium zezidioa sustraitxoan.