Egunez egun

Gipuzkoako Dantzaguneko Sortutakoak 2026 dirulaguntzen ebazpena argitaratu dugu dagoeneko. Balorazio batzordea Carine Aguirregomezkortak (Malandain Ballet Biarritz), Igor Calongek (Sortzailea), Nando Piñeirok (Egiako KE-ko Zuzendaria), eta Oihana Vesgak (Sortzailea) osatu dute, Bertha Bermúdez eta Adriana Pous idazkari izanik.

Gipuzkoako Dantzaguneak Sortutakoak programaren edizio berria abiarazi du. Martxoaren 26tik apirilaren 20ra (14:00) bitartean, dantza profesionalek bost modalitate desberdinetan aurkeztu ditzakete beren proiektuak. Aurtengo oinarriak 2026ko lehen hiruhilekoan sektorearekin egindako mahai sektorialen emaitza dira, laguntzak artisten eta prozesuen behar errealetara egokitzeko asmoz.

Bost egunetan zehar, goiz osoko saio trinkoetan dantza klasikoa eta garaikidea uztartuko dituzte ikastaroek. Horrekin batera, dantzarien prestakuntza osatzeko jarduera osagarriak egingo dira egunero sektoreko profesional adituekin. Azken eguneko saioa eta erakustaldia Lekuona Fabrikan egingo da.

Martxoaren 9tik 13ra, Ibawa kolektiboak Gaua sorkuntza-prozesuaren egonaldia egingo du Dantzagunean, Karrikanekin lankidetzan.

Gaur, Dantzagunean egindako ARTiK topaketetari hasiera emateko, Dobla proiektuaren lehen deialdia aurkeztu da. Mugaz gaindiko ekimen honek Euskadi, Nafarroa eta Euskal Hirigune Elkargoaren lurraldeko konpainien ikuskizunak programatzea eta profesionalak trebatzea du helburu. Hautagaitzak aurkezteko epea gaur, otsailak 19, ireki da eta martxoaren 9ra arte egongo da zabalik.

Datorren martxoaren 5ean, Dantzan Ikasi programaren baitan, Eibarko Portalea Kultur Etxera mintegi bat antolatu da. Mikel Sarriegi ikertzaileak Eibarko dantza-sistema eta Gipuzkoako dantza-maisuen oinordetza nola uztartzen diren aztertuko du, 25 urteko ikerketa baten ondorioak partekatuz.

Unity elkarteak, Gipuzkoako Dantzagunearen eta Lekuona Fabrikaren laguntzrekin, U-Battle ekitaldiaren edizio berri bat aurkezten du otsailaren 20tik 22ra bitartean.

2026an, ARTiK hausnarketarako, praktikarako eta elkarrizketarako lau jardunaldiren inguruan artikulatuko da, EDNren lan-ildoei lotuta. Topaketa hauek artisten, egituren eta sektoreko eragileen arteko trukerako guneak proposatzen dituzte, sorkuntza-prozesuetan, garapen artistikorako baldintzetan eta egungo testuinguruaren erronketan arreta jarriz.

ATALAK sareak bultzatutako "atravesar(nos)" laborategia burutzen ari da aste honetan Gipuzkoako Dantzagunean Elisa Arteta koreografoa. Egonaldiari amaiera emateko, urtarrilaren 30ean, 13:00ean, prozesuaren lagin bat aurkeztuko da.

Dantzaguneak sektoreko profesionalei zuzendutako klase irekien ziklo bat hasiko du. Saioak doakoak izango dira eta astearte zein ostegun goizetan emango dira, urtarrilaren 27tik aurrera.

Dantza-espazioak tratu onaren eta segurtasunaren eredu izan daitezen, Dantzan Ikasi programak formakuntza saio berezia antolatu du Beasainen. Zain elkartearen eskutik, haur eta nerabeen babeserako tresnak eta genero-indarkeriari aurre egiteko gakoak landuko dira, metodologia parte-hartzaile baten bidez dantzako profesional eta irakasleei baliabide praktikoak eskainiz.

Thierry Truffaut antropologo baionarrak Ihauteri: Ilunpetik argira liburua aurkeztuko du Donostiako San Telmo Museoan urtarrilaren 13an. Inauterien eta neguko festen inguruko 50 urte baino gehiagoko ikerketen emaitza sintetizatzen du lan berri honek, Patxi Beltzaiz argazkilariaren irudiekin osatua. "Putz egitea ez da jolastea" kapituluan oinarrituta, Truffautek euskal tradizioen alderdi sakon eta ezezagunetan murgilduko gaitu.