Kulturako dirulaguntzak eskatzeko baliabideak

K bulegoan badakigu informazioa modu labur eta bisualean eskaintzen duten baliabideak izateak kultur proiektuetarako laguntzen deialdiak ulertzen lagun dezakeela. Horregatik, sortu ditugun materialen berri eman nahi dizuegu.

Gipuzkoako Foru Aldundiko Kultura Sailak aurten argitaratuak dauden laguntzen laburpen-taulak egin ditugu: horietako bakoitzaren ezaugarri esanguratsuenak irakurtzeko aukera emango dizuete, begirada azkar batez. Oso garrantzitsua da kontuan hartzea laburpenak direla eta ezin bestekoa dela diru-laguntzen lerro bakoitzaren xehetasunak barneratzeko oinarri orokorroak eta espezifikoak irakurtzea. Gure esperientziatik eta adierazten dituzuen beharrengatik, badakigu berotze-ariketa ona dela laburpenekin hastea, ondoren oinarri orokorrak eta oinarri espezifikoak irakurtzeko eta, horrela, informazio guztia barneratzeko.

Bide batez, gogorarazi nahi dizuegu K bulegoan zuen esanetara gaudela zuen zalantzak argitzeko. Kontsulta egin diezagukezue, edo laguntza eska dezakezue, eta hitzordua emango dizuegu.

Taula-laburpenak:

• OLATUAK diru laguntzak: ikuspegi artistiko-kulturaletik prozesu berritzaileekin eta gizarte eraldaketarekin zerikusia duten proiektu puntualetarako.

• SUSPERKA diru laguntzak: Gipuzkoako panorama artistiko-kulturalean egitasmo berriak abiaraziko dituzten elkarteei zuzenduak.

• OREKA diru laguntzak: egitasmo egonkorrak dituzten irabazi asmorik gabeko kultur elkarteentzako, jarduerak eta proiektuak burutzeko.

• TOKIKO diru laguntzak: Gipuzkoako Udal, Udal elkarte edo Udal entitateei zuzendutakoak.

• LANABESAK: Gipuzkoan gauzatzen diren ikus-entzunezko proiektuak ekoiztu eta hedatzeko diru laguntzak.

• KONPAINIA ESZENIKOAK: Eszena ikuskizunak sustatu eta saltzeko, eta sentsibilizazio, prestakuntza eta bitartekotza programetarako diru laguntzak.

Diru laguntza hauek osatzeko, gure webgunearen diru-laguntzen datu basea kontsultatu dezakezue ere bai.