Koldo Mitxelena Kulturuneak antolatutako Zinemagileen arteko elkarrizketak programaren hirugarren edizioa aurkeztu da
Isabel Coixetek eta Sara Mesak, J.A. Bayonak eta Belén Atienzak, Isabel Herguerak eta Pablo Bergerrek, Víctor Iriartek eta Carlos Muguirok, Elena Martínek, Laura Ferrések eta Javier Macipek, Belén Funesek eta Marçal Cebriánek parte hartuko dute.
- 629
Gipuzkoako Foru Aldundiaren Kultura Departamentuak, Koldo Mitxelena Kulturunearekin batera, Zinegileen arteko elkarrizketak zikloaren hirugarren edizioa antolatu du, aurreko bi edizioen arrakasta oinarri hartuta.
Saio guztiak irekiak izango dira, baina programak prestakuntza alderdia nabarmenduko du edizio honetan; matrikula doakoa izango da eta hainbat proposamen eskainiko dira Elías Querejeta Zine Eskolatik eta Donostia Zinemaldiatik.
Programa Z365 atalarekin —urte osoko Zinemaldia— eta Elías Querejeta Zine Eskolarekin batera antolatu da. Negu taldea, Víctor Iriarte eta Carlos Muguiro, Elena Martín, Laura Ferrés eta Javier Macipe, Isabel Coixet eta Sara Mesa, J.A. Bayona eta Belén Atienza, Belén Funes eta Marçal Cebrián eta Isabel Herguera eta Pablo Berger izango dira aurtengo edizioan parte hartuko dutenak. Programa publiko guztiei irekitako zazpi saiotan antolatuko da.
Aurten, Zinemagileen arteko elkarrizketak Donostiako Alde Zaharreko Santa Teresa komentuan izango da, Koldo Mitxelena Kulturuneko obrak direla eta. Programak bere alderdi pedagogikoa nabarmenduko du edizio honetan, eta prestakuntzaren eremuan sakontzeko aukera emango du. Horrela, nahi dutenek —eta aldez aurretik doako matrikula egin ondoren— Una semana programara joan ahal izango dute apirilaren 8tik 11ra. Programazioaren lanbidearen inguruko proiekzioak eta bestelako ekitaldiak biltzen dituen proposamena da. Era berean, plaza mugatuekin, martxoaren 4tik 7ra bitartean, Rick Prelinger artxibozain, zinemagile, idazle eta hezitzaileak emango duen tailerrera joan ahal izango dira. Tailer hori artxiboko ikus-entzunezko materialen inguruko esku-hartzeari eta muntaketari buruzko tailer praktikoa da. Astebetez bertaratutakoekin lanean ariko da tokiko film artxiboetatik abiatuta, tailerraren amaieran lurraldeari buruzko film dokumental kolektibo bat osatzeko.
Gainera, matrikulatutako pertsonek Sail Ofizialeko edo Belodromoko proiekzioetarako bi gonbidapen jasoko dituzte Donostia Zinemaldiaren 72. ediziorako. Izena eman duten lehenengo 30 pertsonek, halaber, Donostia Zinemaldiaren argitalpenaren ale bat jasoko dute.
Matrikula gaurtik urtarrilaren 8ra arte egin ahal izango da (egun hori barne), doakoa izango da eta herritar ororentzat irekia izango da, ikasle zein zaleentzat (https://gip.eus/zinema). Presentzialtasuna eta topagune izaera laguntzeko, saioak ez dira streaming bidez emango, baina grabazioak Koldo Mitxelena Kulturunearen eta Zinemaldiaren webguneetan egongo dira eskuragarri denboraldiaren amaieran.
Programa honen bidez, film baten ekoizpenean eta errealizazioan ezkutatzen dena hobeto ulertzeko gako berriak eskaini nahi zaizkio zinemazaleari. Zinemagileen arteko elkarrizketak programak aukera ematen digu zinema sorkuntzaren intrahistoria ezagutzeko, elkarrizketa formatu atsegin batean. Elkarrizketa guztietan, zinema lanbide kolektibo gisa hartzen da. Zinemagileaz gain, bertan izango da lankide bat -hainbat esparrutakoa izan daiteke: muntaia, interpretazioa, gidoia, ekoizpena-, belaunaldi bereko beste zinemagileren bat edo abiapuntu edo kezka formal eta tematiko berak dituenen bat.
Hauxe izango da edizio honetako programa:
- Taldean zuzentzea. Negu taldea (urtarrilaren 9a)
- Zinema eta beste diziplina batzuk. Víctor Iriarte eta Carlos Muguiro (otsailak 13)
- Lehen filmak. Elena Martín, Laura Ferrés eta Javier Macipe (otsailak 27)
- Literatura egokitzapenak: Isabel Coixet eta Sara Mesa (martxoaren 7a)
- Animazioaren egoera: Isabel Herguera eta Pablo Berger (data konfirmatzeke)
- Zinema idaztea: Belén Funes eta Marçal Cebrián (maiatzak 7)
- Filmak ekoiztea: J.A. Bayona eta Belén Atienza (data konfirmatzeke)
Saio guztiak 19:00etan egingo dira, Koldo Mitxelena Kulturuneko Santa Teresa komentuko areto nagusian, eta doakoak izango dira.
Programak, zinemagilearen begirada bakarra deszentralizatzeaz gain, proiektu baten garapena osatzen duten lanbide tradizionalenak ezagutzera ematea du helburu, eta, ondorioz, zinema modu kritikoan ikusten eta irakurtzen ikastea, testuinguru jakin batean, testuinguru horren inguruabarrak direla eta, norabide guztietan aldatzen ari baitira.
Zinemaren aldeko apustu hau Koldo Mitxelena Kulturunearen lan-ildo nagusiaren baitan kokatzen da: eztabaida, elkarrizketa eta ezagutza. Testuinguru horretan, lan eremu nagusietako bat ikus-entzunezko proiektuen babesa, sustapena eta hedapena da. Eta, zentzu horretan, Gipuzkoako Foru Aldundiko Kultura Departamentua garatzen ari den ekintza guztiak aipatu behar dira: Elias Querejeta Zine Eskolaren beraren sorrera eta eskola horretan matrikulatzeko bekak; Lanabesak laguntza ildoa, 2017az geroztik iraupen luzeko ikus-entzunezkoen 70 proiektu baino gehiago babestu dituena; edo Gipuzkoako Foru Aldundia San Sebastian-Gipuzkoa Film Comission erakundean sartzea.