Jarraian eredua edo txantiloia lortu behar da, hau da neurrira egokitutako erreprodukzioa. Paper txuri batean edo landare-paperean aukeratutako diseinuaren kopia egiten da, kalkoa erabiliz edo esku hutsez. Marrazkia edo motiboa beirazko objektura pasatzea da ondorengo fasea, eta horretarako bere gainean kalkatzeko papera jartzen da, eta horren gainean txantiloia. Txantiloiaren gainetik arkatzez edo boligrafoz markatzen da, marrazkia beiraren gainean geratzea lortzeko. Eredua erabili gabe, hau da, esku hutsez ere marraztu daiteke landu beharreko piezaren gainean.

Behin gauzakiaren ingerada marrazturik, beiraren gainean kolore guztiak bereizteko berun edo kobre xaflak erabiltzen dira, gustuen arabera. Pintzelekin marraztutako xafla horiek izango dira, azken batean, tonalitateen banaketa egokia mugatuko dutenak.

Teknologia berriek beste teknika berri bat ekarri dute, erretxina aplikatzea, hain zuzen ere. Oso koloretsua da, baina arreta bereziz erabili beharreko teknika da, markatzen dituen erliebeak ongi zehaztu behar baitira. Hainbat koloretan merkaturatzen da, hala nola beltza, urre eta zilar koloreak eta nakar-kolore batzuk.

Giro-tenperaturan lehortzeko prozesua luzea da, inoiz ez hiru egunetik beherakoa. Dena den, hainbat laka eta pinturek labean 200º inguruko tenperaturan lehortzea onartzen dute.

Margotutako beirazko ia objektu guztiak garbitzeko ezin da produktu kimikorik erabili. Horiek garbitzeko egokiena da ur eta xaboiez bustitako belaki bat erabiltzea. Objektua labean tratatu bada, badago ontzi-garbigailuan sartzea.