Eskola kiroleko aseguruaren estaldura: jarduketa protokola

(2025/06/24an eguneratua)

Eskola kiroleko lizentziaren estaldura

Arriskuen estaldurari dagokionez, Euskadiko jarduera fisikoari eta kirolari buruzko martxoaren 30eko 2/2023 Legean xedatutakoa beteko da. Ildo horretan, eskola-kirolaren programako jardueretan izena eman duten parte-hartzaileek (kirolariek, entrenatzaileek, begiraleek, ordezkariek eta epaileek) aseguru-poliza bat izango dute, osasun asistentzia, erantzukizun zibileko arriskuen estaldura, galera anatomiko eta funtzionalengatiko kalte-ordaina eta heriotza bermatzeko.

Estaldura horien onuradun izateko ezinbestekoa da Gipuzkoako eskola-kirolaren programako jardueretan horretarako gaitutako aplikazio informatikoan izena emanda egotea.

Zehazki, hauek dira eskola kiroleko aseguruaren estaldura duten jarduerak:

Eskola-kirolaren urteko programan sartutako programak:
- Multikirola programa
- Kirol-hastapeneko programa
- Jolas-Hezi programa
- EKE programa
- Kirol bakarreko hastapen-programa
- Errendimenduari ekiteko eta talentuak eta promesak hautemateko ibilbideetako jarduerak, lurralde-federazio bakoitzaren urteko hitzarmenen barruan daudenak

Programatik kanpoko gainerako jarduerak (txapelketak, campusak, etab.) eskola-kiroleko aseguruaren estalduratik kanpo geratzen dira.

Aseguruak, halaber, eskola kirolaren aplikazioan izena emanda dauden parte-hartzaileak estaltzen ditu, bai jardueran zehar edo dagokion jarduerarako joan-etorrietan gertatutako edozein istripu, bai istripuaren ondorioz beharrezkok izan daitezkeen errehabilitazio-saioak.

Eskola Kiroleko aseguruaren estaldura eta poliza kontsulta ditzakezu esteka hauen bidez:

Istripua gertatuz gero jarraitu beharreko prozedura (Infografia)

Polizaren estaldura-aldian gertatutako istripu baten ondorioz, aseguratu batek osasun asistentzia behar badu, berehala jarri beharko da harremanetan Sompoko Laguntza Zentralarekin, telefono-zenbaki edo posta elektroniko honen bidez, behar bezala eta hobeto artatzeko: Telefonoa: 911 59 98 54.

Deian informazio hau eskatuko da aseguratua identifikatzeko:

Hartzailearen izena eta/edo poliza-zenbakia (infografian ikusi)
Aseguratuaren izen-abizenak
Aseguratuaren IFZ/AIZ
Harremanetarako telefonoa eta helbide elektronikoa
Aseguratuaren helbidea

Lehen harreman horretan, gertatutakoari buruzko adierazpen bat ere eskatuko da, aseguratua hurbilen dagoen eta arreta medikorako egokiena den Itunpeko Osasun Zentrora bideratu ahal izateko.

Erantzukizun zibileko polizaren estaldura, galera anatomiko eta funtzionalengatiko kalte-ordaina edo heriotza izapidetzeko prozedura:

Eskola-lizentzia duen parte-hartzailearen erakundeak KIROLDATAren bidez gertatutakoaren berri emango du, ♡ ikonora sartuz.

BESTELAKO INFORMAZIOA

Uda kanpaina:

Udako kanpaina programaren barruan dago eta, beraz, eskola-kiroleko aseguruaren estaldura du. Programa honetako izen-emateak tokiko eragileek kudeatzen dituzte eta, ondorioz, estalduraren tramitazioa kirolak@gipuzkoa.eus helbide elektronikotik edo 943 11 24 97 telefono-zenbakitik bideratuko da.

Euskadiko Jokoak

Eskola kiroleko lizentzia nahitaezkoa da Euskadiko Eskolarteko Jokoetan parte hartzeko. Euskadiko Jokoak antolatzen dituen erakundea (Eusko Jaurlaritza) erantzukizun zibileko aseguru bat kontratatzeaz arduratzen da, lehiaketa horretan beren erruz edo zabarkeriaz parte-hartzaileei eragindako kalteengatik, bai eta istripu aseguru bat ere bai.

Espainiako txapelketak

Espainiako Federazioak derrigorrez lizentzia federatua izatea eskatzen duen kasuetan (judoa, adibidez), lizentzia horrek lehiaketan eta/edo entrenamenduan gertatutako edozein istripu estaliko luke. Lizentzia federatuaren aseguruaren estaldurari buruz informazio gehiago nahi izanez gero, jarri harremanetan dagokion federazioarekin. Espainiako Federazioak baimentzen duenean eskola lizentziarekin parte hartzea (hala nola saskibaloia, eskubaloia), eskola lizentziak ez du aseguru estaldurarik, eskola kiroleko programatik kanpo dagoen jarduera bat delako. Kasu horretan, dagokion klubak aseguru bat kontratatu beharko du lehiaketa egunetarako, Espainiako Txapelketara doazen kirolarientzat (adibidez, saskibaloia).