Atzealdea Gazteria Departamentuak TREBAren 5. edizioa ospatuko du Gipuzkoako nerabeentzako programa berri batekin, Treba Gazteak eta Treba Gurasoak prestakuntza-eskaintzei gehitzen zaiena

Prestakuntza-eskaintza doakoa izango da, eta 230 ikastaro inguru izango ditu 2025ean, ongizate emozionalari, begirada kritikoari, sexualitateari eta bizitzarako trebetasunei buruz, adin-tarte bakoitzerako egokituta. Martxoan, apirilean, urrian eta azaroan egingo diren hitzaldi eta tailerren programazioa Gipuzkoako Foru Aldundiko Gazteria Zuzendaritzaren webgunean kontsulta daiteke.

2025/03/20

Kultura eta Gazteria diputatua, Goizane Álvarez, eta Kultura eta Gazteria Sustapeneko zuzendaria, Isaac Palencia, Eukene Gontan, ‘Bizitzarako tresnak’ tailerraren koordinatzailearekin eta Ageda Blasco, "Sexualitatea" tailerraren koordinatzailearekin batera, aurkeztu dute gaur goizean TREBAren bosgarren edizioa, adingabeen eta haien gurasoen prestakuntzan eta ahalduntzean oinarritutako programa. 2025ean, programazioak beste urrats bat eman du, nerabeentzako lerro espezifiko berri bat sortuz: TREBA Nerabeak, lehendik dauden TREBA Gazteak eta TREBA Gurasoak eskaintzei gehitzen zaiena.

Hiru taldeen artean, 230 tailer eta hitzaldi inguru eskainiko dira lurraldeko udalerri eta herri txikietan, eta gai interesgarriak jorratuko dituzte, hala nola osasun mentala, sexualitatea, pantailen erabilera edo nola landu adingabeen autoestimua. 

Gurasoentzako ikastaroak hasita daude; nerabeentzako ikastaroak, berriz, apirilaren 7an hasiko dira, eta gazteentzakoak, 11n. Inskripzioari dagokionez, TREBA Nerabeak eta TREBA Gurasoak udalek eta Gaztelekuek kudeatzen dituzte, eta TREBA Gazteak, berriz, Gipuzkoako Foru Aldundiaren Gazteriaren webgunean inprimaki bidez. Bertan, gainera, hiru programen programazioa kontsultatu ahal izango da.

Diputatuak azpimarratu duenez, Gazteria Departamentuan "argi daukagu Gipuzkoako gazteriaren hezkuntzaren eta garapen pertsonalaren alde egin behar dugun apustua.  Ekimen hau martxan jarri zenetik, 400 hitzaldi inguru egin dira lurralde osoan zehar, 10etik 9ko batez besteko balorazioarekin.  TREBA Nerabeak gehituta, programaren eragina handitu egingo da, eta prestakuntza hazte prozesuaren funtsezko etapa guztietara iritsiko dela bermatuko da".

Bestalde, Palenciak azpimarratu du programa arrakastatsua izan dela, eta nabarmendu du saioetako gaiak parte hartzen duten udalekin adostuta erabakitzen direla, herritarren interesak oinarri hartuta”.

Gazte eta nerabeentzako lau bloke handi

 

TREBA Nerabeak eta TREBA Gazteak lau lan-bloke handiri helduko diete, Gipuzkoako eskualde guztiek gai guztiak lantzeko moduan.  Lerro bakoitzak bere berezitasunak ditu, hartzaileen beharren arabera:

  • Ongizate emozionala. Gaitasun emozionalak garatzeko eta osasun mentala sustatzeko eta prebenitzeko.
  • Begirada kritikoa. Internet eta sare sozialak arduraz eta kontzienteki erabiltzeko gai izan daitezen.
  • Sexualitatea. Harreman osasuntsuak eta errespetuzkoak sustatzeko hezkuntza integrala.
  • Bizitzarako trebetasunak. Beren autonomiarako eta garapen pertsonalerako gaitasun praktikoak gara ditzaten.

Alvarezek adierazi duenez, bloke bakoitzak "oinarrizko ikastaro bat izango du, gaiaren ikuspegi orokor bat jorratuko duena, eta bigarren bat, horretan sakontzeko, ikaskuntza progresiboa eta Gipuzkoako gazte eta nerabeen beharretara egokitua ziurtatuz".

Horrela, TREBA Nerabeak 12 eta 16 urte bitarteko neska-mutilei zuzenduta egongo da, eta haien garapen pertsonalerako tresnak ematea du helburu.  Adin talde horretarako 72 saio prestatu dira, eta Gipuzkoako 38 udalerritan eskainiko dira.

TREBA Gazteak, bestalde, 17 eta 24 urte bitarteko gazteei zuzenduta dago, eta ahalduntze-prozesuan eta helduarorako trantsizioan nola aurrera egin irakastera bideratuta dago.  Helburua gazteen emantzipazio, garapen eta hazkunde pertsonal eta kolektiboko prozesuak sortzea eta finkatzea da. Aurten 45 saio egingo dira lurraldeko 30 udalerri eta herri txikitan.

TREBA Gurasoak gurasotasun positibo baterako

Azkenik, haurren eta nerabeen bizi-kalitatea eta aukerak hobetzeko, TREBA Gurasoak da lurraldeko gurasoei hezkuntza-gaitasunei buruzko prestakuntza emateko lerroa.  Programak ospea irabazi du azken urteotan, eta familiei laguntzeko tresna eta baliabide praktikoak emateko diseinatuta dago, hezkuntza kontzienteagoa, eraginkorragoa eta positiboagoa bultzatuz.

Aurten 113 saio (100 hitzaldi eta 13 tailer) antolatuko dira Gipuzkoako 67 udalerritan.  TREBA Gurasoak programaren edizio berri honek 20 gai bilduko ditu guztira. Horien artean, aurreko urteetan jorratutako batzuk daude, hala nola "Nola jarri arauak eta mugak", "Nola sustatu autoestimua" edo "Pantailen erabileraren kudeaketa", eta berriak diren beste batzuk, hala nola "Anai-arreben arteko gatazken kudeaketa", "Elikadura-jokabide osasungarrien sustapena", "Familien gaikuntza heriotzaz naturaltasunez hitz egiteko", edo "Suizidioaren prebentzioa bizitza sustatzeko".

Ikastaroen programazioari buruzko informazio gehiago nahi izanez gero, jo Gazteria Zuzendaritzaren webgunera.  Baita lerro bakoitzaren agendara ere:

TREBA Nerabeak: https://www.gipuzkoa.eus/eu/web/gazteria/treba/nerabeak

TREBA Gazteak: https://www.gipuzkoa.eus/eu/web/gazteria/treba/gazteak

TREBA Gurasoak agenda: https://www.gipuzkoa.eus/eu/web/gazteria/treba/gurasoak/2025-agenda

 

 

Jarraitu gure sareak