Kultura ezberdinak ezagutzeak, beste herrialdeetako gazteekin elkarlanean proiektuak garatzeak eta bidaiatzeak eragin oso onuragarria izan dezakete gazteen garapen pertsonalean eta profesionalean.
Hori dela-eta, Europar Batasunak gazteen eta gazteria-arloko profesionalen proiektuak garatzeko diru-laguntzak ematen ditu, ERASMUS + programaren bitartez.
Azken urteotan, Gipuzkoako Foru Aldundiak sustaturik, ERASMUS + programak gazteria-arloan eskaintzen dituen aukerak aprobetxatu nahi izan dira Gaztematikaren baitan.
Hala, Aldundiak hainbat baliabide jarri ditu udalen eskura, gazteekin batera trukerako proiektuak aurkeztu eta garatu ditzaten. Bitarteko horien artean azpimarratzekoak dira diru-laguntza, azpiegiturak lagatzea eta Gazteguneko lan-taldearen aholkularitza eta bide-laguntza proiektuaren prozesu osoan zehar: diseinua, onartzeko aurkezpena, garapena eta ebaluazioa.
2022ko proiektua
Digital Youth Work: Profesionalen topaketa Ljubljanan (Eslovenia)
Hainbat herrialdetako gazteria-arloko profesionalen topaketa honen helburua da ingurune birtualak nerabe eta gazteekin lan egiteko dituen aukerak aztertzea.
Aurrez aurre egiten dugun lan pedagogikoa ingurune birtualera zabaltzean haur, nerabe eta gazteekin lan egiten duten profesionalek topa ditzaketen zailtasunei buruz hausnartu nahi da, baita eremu digitalean lan egiteko beharrezkoak diren gaitasunak ezagutu eta honi buruz eztabaidatu ere.
Era berean, aukera izango da hainbat herrialdetan gaiari buruz dauden praktika egokiak eta joera berriak ezagutzeko, eta baita etorkizuneko lankidetzak sendotzeko ere.
Jakinekoa da Internet eta sare sozialak eremu garrantzitsuak direla gaur egungo gazteen bizitzan. Horiek izan daitezke beren bizitza adierazi edo erakusteko tresna nagusiak eta, halaber, erabilienak dira lanerako, beste pertsona batzuekin harremanak izateko eta aisialdirako. Hori gutxi balitz, pandemia ondoren, gazteen parte-hartze digitala hazi egin da, eta, aldi berean, haur, nerabe zein gazteentzako aurrez aurreko zerbitzuek gero eta muga eta zailtasun gehiago izan dituzte; horregatik, ingurune birtualera egokitu behar izan dira.
Unibertso birtual batean lan egin ahal izateko, haur, nerabe eta gazteekin lan egiten duten hezitzaile guztiek oinarrizko trebetasun birtual batzuk eskuratu behar dituzte, eta hori da proiektuaren helburu nagusietako bat.
Proiektua gazteria-arloko lan digitalean (Digital Youth Work-DYW) interesa duten profesionalentzako da. Erakunde bakoitzeko 5 profesionalek bat egingo dute egitasmoarekin. Garrantzitsua da gazteria-arloko lan digitalean esperientzia izatea eta beste partaide batzuekin zerbait partekatzea.
