Berriak

Gipuzkoako Foru Aldundiaren Kultura eta Gazteria Departamentuak bultzatutako Gure Plaza Txo! programak bere presentzia indartu du 2024-2025 ikasturtean, 1.000 biztanletik beherako udalerrietako nerabeen garapen integrala sustatzeko helburuarekin. Proiektuak aisia hezigarriaren bidez nerabeen parte-hartzea, ahalduntzea eta komunitatearekiko lotura indartzen ditu, baliabide profesionalak eskainiz.

Urritik apirilera 213 saio burutu dira eta 609 nerabek parte hartu dute horietan. 2023ko urritik 2025eko apirilera arteko datuak kontuan hartuta, 513 saio eta 1.772 parte-hartzaile zenbatu dira. Zerbitzua ezagutzen duten nerabeen portzentajea % 76,69ra iritsi da, Gure Plaza Txo!-ren errotze-maila nabarmenduz.

Programa honen bidez nerabe taldeak sortu eta egonkortu dira, lan-dinamika positiboak garatuz. Zehar-lerro gisa, euskararen erabilera, bizikidetza eta parekidetasuna, aniztasuna eta inklusioa landu dira. Euskara izan da komunikazioaren ardatz, eta nerabeek protagonismoa hartu dute taldeko jardueretan.

Aisia hezitzailean oinarritutako dinamiken osagarri, gaztetxoek formazio saioak ere izan dituzte. TREBA nerabeak programaren baitan, Ikaztegietan eta Aizarnazabalen egindako jarduerek balorazio oso ona jaso dute. Parte-hartzaileen batezbesteko adina 14 urtekoa izan da, eta saioen balorazio orokorra 8tik gorakoa. Saioak baliagarriak izan dira gaitasun pertsonalak lantzeko.

Gure Plaza Txo! programak, gainera, herrien arteko elkarlana eta koordinazioa sustatu ditu, udalerrien baliabideak partekatuz eta ekintza bateratuak antolatuz. Gizarte Zerbitzuekin izandako lankidetza ere funtsezkoa izan da egoera zaurgarrian dauden nerabeekin esku-hartzeak gauzatzeko.

Gipuzkoako Foru Aldundiaren Gazteria Zuzendaritzaren konpromisoak emaitza emankorrak ekarri ditu: herri txikietako nerabeek beren komunitatean lekua aurkitu dute, eta egitasmoa erreferentziazko zerbitzutzat jotzen da gaur egun.

Jarraitu gure sareak