Atzealdea
Gaztematika sareak 2025-2026 ikasturteari hasiera eman dio bere lehen foro teknikoarekin
Gaztematikaren 17. plana aurkeztu da, legegintzaldiko hirugarrena, eta 18 ekintza biltzen dituena.
2025/10/16
Donostiako Gaztegune egoitzan egin da Gaztematika sarearen 2025-2026 ikasturteko lehen foro teknikoa, non Gipuzkoako udaletako haurren, nerabeen eta gazteen arloko profesionalek bat egin duten ikasturte berriari hasiera emateko.
Foroaren hasieran, Isaac Palencia Gazteria zuzendariak, ongietorria egin die bertaratuei. Aurreko ikasturteko planaren ebaluazioa itxi ondoren, 2025-2026 ikasturteko plana aurkeztu da, datozen hilabeteetarako sarearen lan-ildo estrategikoak markatuko dituena.
2023-2027 legealdiko hasieran lau ardatz estrategiko ezarri ziren sarearen planifikaziorako: ongizatea sustatzea, aukera-berdintasuna bultzatzea, herritartasun aktiboa erraztea parte-hartzea bultzatuz eta partaidetzazko gobernantza bultzatzea. Ardatz horiek kontuan hartuta, plan berriak hiru jarduera-multzo nagusi landuko ditu aurten:
“Ingurune On” estrategia: Pasa den ikasturtean haur, nerabe eta gazteengan eragina duten lege berriek ezarritako betebeharrak aintzat hartuta, “Ingurune On” eredua marraztu zen aisia hezigarriaren eremuan indarkeria prebenitzeko. Aurten, estrategia hori lurraldeko itun bilakatzea izango da helburua, ingurune seguru, babesle eta tratu onekoak sustatuz.
TREBA programa eta gazteentzako politikak: Nerabe, gazte, familia eta profesionalei zuzendutako prestakuntza-programarekin jarraituko da eta, horrez gain, gazteen zerbitzuaren definizioan aurrera egiteko pausuak emango dira.
Gaztematikaren gobernantza eta parte-hartzea: sareko eragileen arteko koordinazioa eta elkarlana indartuko dira.
Guztira, 18 ekintza biltzen ditu plan berriak, legegintzaldiko erronkak garatzen jarraitzeko eta Gaztematikaren lau ardatzetan aurrera egiteko helburuarekin.
Foroaren amaieran, parte-hartzaileek Ingurune On estrategiari buruzko talde-dinamika batean parte hartu dute ekintza publikotik haur eta gazteentzako espazio seguru, inklusibo eta babesleak bultzatzen jarraitzeko moduari buruz hausnartzeko.
