Berriak

2021eko irailean hasi zen Gipuzkoan Gazte Digitala programa, gazteei ahotsa emateko helburuarekin. Istorio interesgarriak izan dira: bolo-bolo dabiltzan artisten edo artista berrien aurkezpenak eta gainditze-istorioak (bullying-aren errealitatea, goi-mailako kirolari batek bizi duen presioa edo genero esparru tradizionalez haratagoko izaerak -ez bitarra-). Jasangarritasuna xede duten, alegia lankidetza eta ingurumenaren defentsan lan egiten duten ekimenak ere izan dira.

Halaber, musikak indar handia izan du programan, Gipuzkoan Gazte Tour ekimeneko jardunaldi guztien segimendua egin da. Artista ezagun mordoa izan dira, bai egin diren tailerretan (Rap tailerra La Basurekin, graffiti eta parkour tailerrak, K-POP dantza tailerra, dantzako masterclass-a Claudia Rierarekin, etab.), bai kontzertuetan: Hard GZ, Anier, Shaolin Monkey, Foyone, Sofia Gabanna, Delaossa, Miren, Chica Sobresalto, Dupla, Ainhoa Larrañaga, Anne Lukin, Zetazen, Green Valley, Laina, Julen, Julene Iraola.

Saioek entretenimendu kutsua izan duten arren, arlo pedagogikoak ere izan du tokia eta Gazteria Zuzendaritzaren hainbat programa ere izan dira protagonista, adibidez, TREBA gazteak. Gazteei zuzenduriko ahalduntze-eskola honetan adimen emozionalari eta osasun mentalari buruzko hitzaldiak edota edertasun-kanonen inguruko hausnarketak egin dira. Otsailean ere tailerrak izango dira Donostian eta Legazpin: doakoak dira eta izena emateko epea irekita dago.

Ikastaroa	Herria	Data	Egoera
Adimen emozionala: zer da sentitzen dudana?	Legazpi	Otsailak 11	EPEA IREKITA
Zeharkako gaitasunak; benetan behar dudana ikasi	Donostia	Otsailak 16	EPEA IREKITA

Hiru hilabetez astean behin 15 minutuko Web TV-a argitaratu da Youtuben eta Instagram izan da horren erakuslehio nagusia. Ikus-entzunezko piezek 1.000 ikustaldi inguru izan dituzte, batez beste, eta ikustaldi gehien izan dituenak 3.000 erreprodukzio baino gehiago izan ditu.

Hemen dituzu ikus-entzunezko guztiak

Jarraitu gure sareak