Berriak

Sormen Ola programak hainbat diziplinatako profesionalak bilduko ditu datorren hilabeteetan. Hilean behin, 16 eta 29 urte bitarteko gazteek euskal sormenarekin eta kulturarekin lotutako gai monografiko bat landu ahal izango dute, musika, literatura, arte, antzerki, ikus-entzunezko, dantza edo bertsolaritzako profesionalekin.

Sortzaile izan nahi duten gazteei espazioa eta prestakuntza eskaintzeko sortu dute proiektu hau Loraldiak eta UPV/EHUk, eta aldi berean Euskal kulturaren transmisioa sustatzeko. Tailerrak maiatza arte egongo dira martxan, joan den larunbatean lehen tailerra egin zen Jon Maya dantzariaren eskutik.

TAILER TRINKOAK HILEAN BEHIN LARUNBATETAN

Urtarriletik maiatzera bitartean tailerrak egingo dira, hilean behin larunbat goizean, UPV/EHUko Bizkaia Aretoan. Gaiak monografikoak izango dira, sormenaren hainbat arlo landuko dira eta erreferentziazko profesionalek eskainiko dituzte, hala nola Jon Maya, Patxo Telleria, Joseba Sarrionandia, Paul Urkijo edo Miren Amuriza.

Matrikula doakoa izango da Bizkaiko campuseko ikasleentzat baina gainerako parte-hartzaileentzat saio bakoitzak 15 €-ko prezioa du.

BESTE LAU SAIO EUSKAL PROFESIONAL SORTZAILEEKIN

• Otsailaren 18an, Patxo Telleriak arte eszenikoetako sormenari buruzko tailerra emango du: istorioak asmatzeko giltzak aztertu eta praktikan jarriko dira.
• Martxoaren 25ean, Joseba Sarrionandiak eta Iholdi Beristainek literatura eta musika lantzeko tailerra egingo dute.
• Apirilaren 29an jarraituko dute tailerrek Paul Urkijorekin. Zinegileak ikus-entzunezko garaikideei buruzko saio bat eskainiko du. Tailerrak aukera emango du euskal zinemaren egungo egoera bere esperientziatik abiatuta ezagutzeko.
• Maiatzaren 27an, azkeneko saioan Miren Amuriza eta Amaia Egidazu izango dira. Joskintza-tailerra egingo dute, sormena hitzetik eta irudietatik lantzeko.

INFORMAZIO GUZTIA

Jarraitu gure sareak